Saerbeck's community based projects can be a model for Cambodia's energy development

Saerbeck's community based projects can be a model for Cambodia's energy development
Thmey Thmey Media Online
,
Southeast Asia

Saerbeck's community based projects can be a model for Cambodia's energy development

Bonn-​អាល្លឺម៉ង់​៖ មាន​ទីតាំង​ស្ថិតនៅក្នុង​រដ្ឋ North Rhine-Westphalia នៃ​ប្រទេស​អាល្លឺម៉ង់  ក្រុង Saerbeck (Saerbeck Municipality) ក្លាយជា​តំបន់​ដ៏​ល្បីល្បាញ​អាច​ផលិត​អគ្គិសនី​ដោយ​ប្រើ​កម្លាំង​ខ្យល់ ថាមពល​ពន្លឺព្រះអាទិត្យ បូករួម​ជាមួយ​ថាមពលជីវម៉ាស​ផងដែរ​។ វា​ជា​គម្រោង​អភិវឌ្ឍ​ថាមពល​ស្អាត​ថ្នាក់​សហគមន៍​ដែល​ផ្តើមចេញពី​គម្រោង​តូចៗ  ប៉ុន្តែ​វា​រួមចំណែក​កាត់បន្ថយ​ការបំពុល​បរិស្ថាន និង​ចូលរួម​ដោះស្រាយ​បញ្ហា​ប្រែប្រួល​អាកាសធាតុ​សាកល​ផង​។​

 



​ក្រុង Saerbeck មាន​ប្រជាជន​រស់នៅ​ជាង ៧​ពាន់​នាក់ ហើយ​ក្រុង​នេះ​មានឈ្មោះ​បោះ​សំឡេង​ដោយ​អនុវត្ត​គម្រោង​ថាមពល​ស្អាត​ថ្នាក់​សហគមន៍​ដោយ​ជោគជ័យ​ចាប់ពី​ឆ្នាំ ២០០៨​។ តំបន់​នេះ​ក៏បាន​បន្ត​ឈ្នះ​ពានរង្វាន់​ជា​បន្តបន្ទាប់​ដោយ​ឈានមុខ​គេ​ក្នុង​ការផលិត​អគ្គិសនី​ដើរ​ដោយ​ថាមពល​ករ​កើតឡើង​វិញ និង​ធានា​និរន្តរភាព​នៃ​បរិស្ថាន​ផងដែរ​។​

​ប្រធាន​ផ្នែក​បច្ចេកទេស Guido Wallraven បាន​អះអាងថា សហគមន៍​របស់លោក​ប្តេជ្ញាចិត្ត​ថា នឹង​ឈានទៅ​បញ្ឈប់​ការបញ្ចេញ​ឧស្ម័ន​កាបូ​និ​ច​ទាំងស្រុង​នៅ​ឆ្នាំ ២០៣០​។ លោក​បាន​ពន្យល់ថា គម្រោង​អភិវឌ្ឍ​ថាមពល​ស្អាត​ថ្នាក់​សហគមន៍​នេះ​ត្រូវបាន​ផ្តួចផ្តើម​ដោយ​អាជ្ញាធរ និង​មានការ​វិនិយោគ​ដោយ​ប្រជាជន​ក្នុង​តំបន់​ផង​ទើបបានជា​វា​ជោគជ័យ​។ ប៉ុន្តែ​អ្វីដែល​គួរ​ឲ្យ​កត់សម្គាល់ថា គម្រោង​ដ៏​មាន​សក្តានុពល​នេះ​ផ្តើមឡើង​ពី​តូចៗ ហើយក៏​មិនមាន​ការឧបត្ថម្ភ​គាំទ្រ​អ្វី​ពី​រដ្ឋបាល​សហព័ន្ធ​ដែរ​។​

​ពេល​សាក​សួរថា តើ​គម្រោង​សហគមន៍​បែបនេះ​អាច​អនុវត្តបាន​នៅ​សហគមន៍​ដទៃទៀត​នា​ប្រទេស​កំពុងអភិវឌ្ឍន៍​បាន​ឬ​យ៉ាងណា លោក Guido Wallraven បាន​ថ្លែងប្រាប់​សារព័ត៌មាន​ថ្មីៗ​ដូច្នេះ​ថា​៖ « គម្រោង​បែបនេះ មនុស្ស​គ្រប់គ្នា​អាចធ្វើ​បាន​មិន​ថា​នៅ​ប្រទេស​ក្រីក្រ ឬ​អ្នកមាន​ឡើយ​។ គេ​អាច​ចាប់ផ្តើម​ពី​គម្រោង​តូចៗ​ព្រោះ​វា​មិនត្រូវ​ការ​អ្វី​ធំដុំ​ឡើយ​។ យើង​កសាង​សហគមន៍​បៃតង​ដែល​មិន​បំពុលបរិស្ថាន​នេះ​ដោយ​ខ្លួន​យើង​ផ្ទាល់​ដោយ​ប្រាប់​ប្រជាជន និង​ស្នើ​ឲ្យ​ប្រជាជន​ចូលរួម​ជាមួយ​»​។ 



​តាមពិតទៅ​គម្រោង​អភិវឌ្ឍ​ថាមពល​ស្អាត​ថ្នាក់​សហគមន៍​នេះ​មាន​សារសំខាន់​សម្រាប់​សហគម​ន៍​នានា​លើ​ពិភពលោក​ជាពិសេស​ប្រទេស​ក្រីក្រ​។ ដូច​ការលើកឡើង​រប​ស់​អ្នកជំនាញ​ខាងលើ វា​សុទ្ធតែ​អាចអនុវត្ត​មាន​ដោយ​ចាប់ផ្តើម​ពី​គម្រោង​តូចៗ​ក្នុង​សហគមន៍​។ 

​បើតាម​លោក Wallraven បញ្ហា​ប្រឈម​ធំ​របស់​ក្រុង Saerbeck ពេល​ចាប់ផ្តើម​គម្រោង​នេះ​គឺ ធនធានមនុស្ស​ព្រោះ​ការផលិត​ថាមពល​ស្អាត​ត្រូវការ​មនុស្ស​ដែល​អាច​ចូលរួម​និង​អាច​កាន់កាប់​ការងារ​បាន និង​ត្រូវការ​ហិរញ្ញវត្ថុ​ផងដែរ​។ បច្ចុប្បន្ន​ក្រុង Saerbeck ក៏​ប្រឹងប្រែង​លើកកម្ពស់​ការយល់ដឹង​ដល់​ក្មេង​តូចៗ​ផងដែរ​ពី​ការផលិត​ថាមពល​ស្អាត​នេះ​ដោយ​ជំរុញ​ឲ្យ​ពួកគេ​មក​សិក្សា​រៀនសូត្រ និង​ដកស្រង់​បទពិសោធន៍​ពី​សហគមន៍​ផងដែរ​។ 



-​គម្រោង​អភិវឌ្ឍ​ថាមពល​ស្អាត​មូលដ្ឋាន​ជា​គំរូ​ល្អ តែ​ប្រឈម​បញ្ហា​ច្រើន​នៅ​ប្រទេស​កំពុង​អភិវឌ្ឍ​

​អ្នកជំនាញ​ថាមពល ប្រទេស​កំពុង​អភិវឌ្ឍ​ដូច​កម្ពុជា​ក៏​អាច​រៀនសូត្រ​បាន​ពី​គម្រោង​សហគមន៍​នៅ​តំបន់  Saerbeck នេះដែរ ដោយ​ជំរុញ​ការអនុវត្ត​គម្រោង​ថាមពល​តាម​សហគមន៍​មូលដ្ឋាន​។ 
​ប៉ុន្តែ​វា​ប្រហែល​ពិបាក​អនុវត្ត​នៅ​ប្រទេស​កំពុង​អភិវឌ្ឍ​ដោយសារ​បញ្ហា​ប្រឈម​មួយចំនួន​ជាពិសេស​បច្ចេកវិទ្យា​ស្តុក​ថាមពល​ទុក​ប្រើប្រាស់ (Battery Storage)​។​

«​ដំបូង​យើង​ត្រូវ​ដឹងថា តើ​សហគមន៍ Saerbeck មាន​ថាមពល​អ្វីខ្លះ​។ បើសិន​វា​មាន​ទាំងពីរ​ថាមពលព្រះអាទិត្យ និង​ថាមពលខ្យល់ វា​អាចជួយ​ធានា​ស្ថិរភាព​នៃ​ការផ្គត់ផ្គង់​ថាមពល​អគ្គិសនី​បាន​។ ថាមពលខ្យល់ និង​ថាមពល​ពន្លឺព្រះអាទិត្យ​បំពេញ​គ្នា​ទៅវិញទៅមក​។ សម្រាប់​សហគមន៍​ឬ​តំបន់​ដែល​មានតែ​ថាមពលខ្យល់ ឬ​មានតែ​ថាមពល​ពន្លឺព្រះអាទិត្យ វា​ជា​រឿង​លំបាក​សម្រាប់​ការធានា​ការផ្គត់ផ្គង់​ថាមពល​អគ្គិសនី​គ្រប់គ្រាន់​»​។  នេះ​ជាការ​បញ្ជាក់​របស់​សេដ្ឋវិទូ​ថាមពល​ប្រចាំ​វិទ្យាស្ថាន​ស្រាវជ្រាវ​សេដ្ឋកិច្ច​សម្រាប់​តំបន់​អាស៊ាន​និង​អាស៊ី​បូព៌ា​លោក​បណ្ឌិត ហាន ភូមិន្ទ ប្រាប់​សារព័ត៌មាន​ថ្មីៗ​តាម​សារ​អេ​ឡិច​ត្រូ​និ​ច ។​



​អ្នកជំនាញ​រូបនេះ​ពន្យល់​បន្ថែមថា យ៉ាងណាមិញ ក្នុងករណី​ដែល​វា​មាន​បច្ចេកទេស​សម្រាប់​ស្តុក​ថាមពល​ទុក​សម្រាប់​ប្រើប្រាស់ គេ​អាច​ធានា​ស្ថិរភាព​នៃ​ការ​ផ្គត់​ផ្គង​ថាមពល​អគ្គិសនី​បាន​។ ប៉ុន្តែ​វា​ត្រូវ​ចំណាយ​ច្រើន ហើយ​វា​មិន​សមស្រប​សម្រាប់​ប្រទេស​កំពុង​អភិវឌ្ឍ​ឡើយ​។​

-​កម្ពុជា​គួរ​ផ្តោតលើ​ថាមពលព្រះអាទិត្យ និង​ជីវម៉ាស​

​បច្ចុប្បន្ននេះ ថាមពល​ពន្លឺព្រះអាទិត្យ និង​ជីវម៉ាស​ជា​អ្វីដែល​កម្ពុជា​ត្រូវផ្តោត​សំខាន់​។ យ៉ាងណាមិញ​កម្ពុជា​ពិបាក​ឈានទៅ​ផលិត​អគ្គិសនី​ដោយ​ប្រើប្រាស់​ថាមពលខ្យល់​។​


​លោក​បណ្ឌិត ហាន ភូមិន្ទ បាន​ប្រាប់​សារព័ត៌មាន​ថ្មីៗ​ដូច្នេះ​ថា ៖ « កម្ពុជា​ត្រូវ​ឈានទៅរក​ថាមពល​ពន្លឺព្រះអាទិត្យ ហើយ​ដូច​យើង​បាន​សង្កេត​ឃើញស្រាប់​ហើយ​វា​កំពុងតែ​វិ​វត្ត​ទៅមុខ​ឥឡូវនេះ​។ ដោយសារ​មាន​ជីវម៉ាស​ច្រើន​ក្នុងស្រុក កម្ពុជា​ក៏​គួរ​ជំរុញ​ឲ្យ​មាន​ការផលិត​អគ្គិសនី​ដើរ​ដោយ​ថាមពលជីវម៉ាស​ផងដែរ​។ លើសពីនេះ ការផលិត​អគ្គិសនី​ដើរ​ដោយ​ថាមពលទឹក​ខ្នាតតូច​នៅតាម​សហគមន៍​ក៏​គួរ​ត្រូវ​ជំរុញ​ផងដែរ​ក្នុងស្ថានភាព​បច្ចុប្បន្ន​»​។​

​ពាក់ព័ន្ធ​ការផលិត​អគ្គិសនី​ដើរ​ដោយ​ថាមពលខ្យល់​វិញ អ្នកជំនាញ​មើលឃើញថា កម្ពុជា និង​តំបន់​អាស៊ីអាគ្នេយ៍​ទាំងមូល​នៅ​ប្រឈម​បញ្ហា​ច្រើន​ក្នុងនោះ​មាន​ល្បឿន​ខ្យល់ បច្ចេកវិទ្យា និង​ការចំណាយ​ច្រើន​ផង​។ 

«​ទោះបីជា​ប្រទេស​ជាច្រើន​ក្នុង​តំបន់​អាស៊ីអាគ្នេយ៍​មាន​សក្តានុពល​ទាក់ទង​នឹង​ថាមពលខ្យល់​ក៏ដោយ ល្បឿន​ខ្យល់​នៅក្នុង​តំបន់​នៅតែ​ជា​ប្រភព​សំខាន់​ក្នុង​ការផលិត​អគ្គិសនី ហើយ​វា​ក៏​ទាក់ទង​នឹង​បច្ចេកវិទ្យា និង​ការចំណាយ​ផងដែរ​»​។ លោក ហាន ភូមិ​ន្ទ បានបញ្ជាក់​ដូច្នេះ​។ 

​តាមពិតទៅ ផ្អែក​តាម​ការស្រាវជ្រាវ​ផ្នែក​វិទ្យាសាស្ត្រ ខ្យល់​ដែល​អាច​ប្រើប្រាស់​ដើម្បី​ផលិត​ថាមពល និង​ដើម្បី​បង្វិល​តួប៊ីន​បាន​យ៉ាងហោចណាស់​មាន​ល្បឿ​ចាប់ពី ៦ ទៅ ៨ ម៉ែត្រ​ក្នុង​មួយ​វិនាទី​ដែរ​។ 

​ដោយឡែក ពេល​សាក​សួរថា តើ​កម្ពុជា​ក៏​គួរផ្តោត​លើ​ការអប់រំ​ក្មេងៗ​ពាក់ព័ន្ធ​ការអភិវឌ្ឍ​ថាមពល​កកើតឡើង​វិញ​នេះ​ដូច​នៅ​សហគមន៍ Saerbeck ឬ​យ៉ាងណា​នៅពេល​អនាគត លោក​បណ្ឌិត​ ហាន ភូមិ​ន្ទ ឆ្លើយថា វា​ជា​គំនិតល្អ​ដែល​កម្ពុជា​គួរ​គិតគូរ​ដែរ​។ 

​លោក​យល់ថា បើសិនជា​អាចធ្វើ​បាន កម្ពុជា​គួរ​ដាក់បញ្ចូល​ចំណេះដឹង​ពាក់ព័ន្ធ​ថាមពល​ករ​កើត​ឡើងវិញ​ក្នុង​កម្មវិធី​អប់រំ​ឲ្យ​បាន​លឿន ព្រោះ​វា​រួមចំណែក​លើកកម្ពស់​ចំណេះដឹង និង​ជំរុញ​ការផលិត​អគ្គិសនី​ដើរ​ដោយ​ថាមពល​កកើតឡើង​វិញ​ដោយ​ជោគជ័យ​នៅពេល​អនាគត​ផងដែរ​៕

By visiting EJN's site, you agree to the use of cookies, which are designed to improve your experience and are used for the purpose of analytics and personalization. To find out more, read our Privacy Policy

Related Stories